الصحيان بدري مهمة مستحيلة ولكن

مع أول أيام المدرسة بتكون مهمة الصحيان بدري من المهمات التقيلة على الأم والأولاد. بالنسبة للأولاد أكيد بيكونوا محتاجين يناموا وقت أطول. لكن مع الأمهات فهي بتكون في صراع وحرب مش بتنتهي عشان يصحوا كل يوم. لذلك النهادرة هنقولك تساعدي الولاد ازاي على التغلب على المشكلة دي.

خطوات تساعد الأولاد على الصحيان بدري

خطة الصحيان بدري ما ينفعش تبدأ مع أول يوم للمدرسة. الوقت الحالي هو الوقت المناسب لده عشان يدخلوا على المدرسة وهما متعودين على الروتين. لذلك انت محتاجة تقومي بالخطوات دي:-

تغيير نمط النوم قبل الدراسة

قبل الدراسة بحوالي أسبوع ابدأي جهزي الولاد ودربيهم على الصحيان بدري. مثلاً لو كانوا بيصحوا الساعة 10  يبقى يتدربوا يصحوا 9 في أول يوم، تاني يوم يكون 8. أما لو كانوا بيصحوا بعد 10 فهما محتاجين تغيير جذري في نمط الحياة كله.

خلي الشمس عامل مساعد

من حسن الحظ إن الطبيعة بتصحى بدري، والشمس تقدر تساعدك. عشان كده قبل ما تبدأي معركتك افتحي الستائر وخلي الشمس هي اللي تبدأ مهمة الصحيان قبل منك بكتير.

خطة الاستعداد للنوم

تغيير نمط النوم وميعاده محتاج خطة خاصة باليوم كله. مثلاً لو كان الأطفال متعودين على العشاء المتأخر يبقى لازم نبدأ في تقديم العشا بدري. كذلك حاولي تقللي وقت اللعب عشان ما يبقاش في حجة للسهر. ابدأي بروتين الدش الدافئ قبل النوم عشان يقدروا يستسلموا لليوم بسرعة.

التحفيز والعقاب

التحفيز والعقاب من أفضل الحاجات اللي التربية لازم تعتمد عليهم. عشان كده خلي الدخول للنوم بدري له مكافأة. أما الدخول في النوم متأخر فله عقاب. ممكن يكون العقاب مرتبط بتقليل وقت الفيديو جيم. أو سحب امتياز معين عند الأطفال.

اتكلمي مع أولادك

في أطفال بتحب الاقناع وكل ما اقنعتيها بالمبدأ كل ما هيتلزموا بيه. عشان كده ما تخليش قرار النوم المبكر قرار ديكتاتوري. لكن اتكلمي معاهم عن أهمية النوم وخطر السهر. اديهم أمثلة على الفرق بين الأشخاص اللي بتحافظ على نشاطها من خلال النوم المبكر وبين الأشخاص اللي بيناموا لفترات قصيرة. ساعديهم يدوروا على كل حاجة لها علاقة بخطورة النوم المتأخر وده هيكون له نتائج إيجابية جداً.

للمزيد: قلق الرجوع للمدرسة وازاي نتعامل معاه؟.