البلاستيك من أكثر المواد اللي بنستخدمها في حاجات كثير وخصوصاً في أدوات الطعام. اللانش البوكس والزمزمية وزجاجات المياه ده غير الورق الشفاف المخصص لتغليف الأطعمة أو الأطباق. مش بس كده هو من المواد اللي بتدخل في صناعة الألعاب والأدوات اللي أولادنا بيستخدموها. بس يا ترى هل كل الأنواع آمنة؟ وهل من الممكن إني أستخدم أي نوع وأعمل بيه أي حاجة؟ كل ده هنعرفه في مقالنا النهاردة.
إزاي أعرف درجة أمان البلاستيك واستخدامه؟
من وقت طويل جداً وفي جدل حوالين المواد البلاستيكية. هل هي آمنة تماماً؟ إيه هي أضرارها؟ هل كل الأنواع ممكن نستخدمها في تخزين الأكل وخصوصاً الأكل الساخن؟ وإجابة الأسئلة تتلخص في مجموعة من الأرقام. كل رقم فيهم بيدل على درجة أمان البلاستيك وطريقة استخدامه، لو اشتريتي أي منتج تقدري تقري الرقم اللي مكتوب عليه وتحددي إذا كان مناسب ولا لأ.
دلالات أرقام المنتجات البلاستيكية
رقم (1) Pet
لو لاقيتي رقم (1) هو المطبوع على أي منتج مصنوع من المواد البلاستكية ده دليل على إن النوع ده صالح للاستخدام مرة واحدة بس. وده تقريباً النوع اللي بيتم تصنيع زجاجات المياه المعدنية والعصائر منه. ناس كثير بتستهون من استخدام النوع ده مرة ثانية. لكن الخطر الحقيقي إن النوع ده له القدرة على امتصاص جزء من المادة المعبأة داخله. وفي نفس الوقت يسمح بنمو البكتيريا. عشان كده بعد استخدامه لمرة واحدة لابد من التخلص منه تماماً.
رقم (2) HDPE
وده البلاستيك المصنوع من البولي إيثلين عالي الكثافة. المادة دي آمنة وصلبة وقابلة للتدوير. لكن النوع ده بيفضل استخدامه في علب الشامبو أو لعب الأطفال، لكن في النفس الوقت غير مفضل لو لاستخدامات الطعام المختلفة.
رقم (3) PVC
البلاستيك المطبوع عليه رقم (3) معناه أنه بلاستيك ضار وسام جداً. النوع ده بيستخدم فقط في صناعة المواد زي مواسير السباكة أو الستائر. يعني غير صالح للاستخدامات الغذائية أو حتى في اللعب والمنتجات الخاصة بالأطفال.
رقم (4) LDPE
بالنسبة لرقم (4) فهو بلاستيك آمن نسبياً، يعني الأفضل استخدامه مع الأغذية في درجة الحرارة العادية. في الحالة دي مش بيتفاعل مع الأكل. الأنواع دي يفضل استخدامها في صناعة الأكياس المخصصة للتغليف.
رقم (5) PP
رقم (5) من أكثر الأنواع الآمنة. وهو ممكن يستخدم مع كل أنواع الأغذية بمختلف درجة حرارتها. وهو كمان بيستخدم في صناعة علب الأغذية المختلفة والاطباق والأدوية.
رقم (6) PS
النوع ده ممنوع بتاتاً استخدامه في أي غرض غذائي. وهو بيكون مصنوع من مادة تشبه الفلين وللأسف أماكن كثيرة ومطاعم بستخدمه بغض النظر عن خطورته.
رقم (7) PC
من الأنواع اللي نقدر نقول عليها مالهاش تصنيف. هو بيتكون من خليط من أنواع البلاستيك المختلفة، وده سبب امتناع الكثير من الشركات عن استخدامه في لعب الأطفال أو زجاجات البلاستيك. لكنه بيستخدم في صناعة الأقراص المدمجة أو النظارات وغيرها من المواد. ومن الأفضل إننا نتجنب أي حاجة مصنوعة من النوع ده إلا لو كان مكتوب عليها إنها خالية من مادة BPA (ثنائي الفينول أ).
ازاى نقلل من خطر استخدام البلاستيك؟
هل في طريقة ممكن تساعدنا نقلل من خطر البلاستيك في حياتنا؟ ده حقيقي وممكن، ونقدر نحققه بالخطوات دي:-
- أولاً على قد ما نقدر نتجنب استخدام العلب البلاستيكية في أدوات المطبخ أو الأغذية. ده يحصل عن طريق استخدام البدائل زي الزجاج أو علب الفولاذ الصلب أو البايركس.
- في حالة شراء الأغذية من الخارج فمن الأفضل إننا ندور على الأنواع اللي مش مغلفة بالبلاستيك أو محفوظة جواه، العلب الورقية هي أفضل بديل.
- الامتناع تماماً عن استخدام العلب المصنوعة من المواد البلاستيكية الشبيهة بالفلين.
- في حالة وجود ضرورة لاستخدام البلاستيك يبقى من الأفضل نتعرف على العلامة الخاصة بيه وهل هو صح ولا لأ، لو البلاستيك خالي من أي علامات فالأفضل إننا ما نشتريهوش.
- بالنسبة للعب الأطفال في أنواع كثير خالية من البلاستيك ومصنوعة من الأقمشة الطبيعية أو الخشب، الأنواع دي مفضلة للأطفال لحد سن 3 سنين.
- تجنب تماماً تسخين الطعام في أي نوع من أنواع البلاستيك حتى المقاوم للحرارة.
اقرأي أيضاً: 5 منتجات من السيليكون لا غنى عنها للطفل
