ما الذي حدث عندما شرب سانتا كلوز الكوكاكولا؟

مين فينا مش بيتمنى إن سانتا كلوز يكون شخص حقيقي. راجل عجوز طيب دقنه فضي ولابس بدلة حمراء يجي من بين جبال الثلج بعربة تجرها الغزلان ويسيبلنا أمنياتنا عند الباب مع بداية السنة. يا ترى يا سانتا أنت موجود ولا مجرد خيال. بس ثانية واحدة إيه علاقة سانتا بالكوكاكولا.. وهو في خيال بيشرب كوكا؟.. وقبل ما تحتاروا في التفكير خليني أحكي لكم حكاية سانتا، وأقول لكم إيه علاقته بمشروب كوكاولا.

امتى وفين بدأت حكاية سانتا كلوز؟

كان يا مكان في القرن الثالث بعد الميلاد في بلد صغيرة في تركيا كان في قديس اسمه القديس نيكولاس. القديس ورث عن والده ثروة كبيرة. ولأنه كان تقي وبيحب عمل الخير قرر يقف جنب الفقراء والمحتاجين ويساعدهم بالمال من غير ما يعرفوا هو مين. وكان كل ما يعرف إن في حد محتاج يسيب له النقود على باب البيت.. وتدور الأيام الطويلة والقديس نيكولاس مكمل رحلته في مساعدة المحتاجين.

وفي يوم من الأيام نيكولاس كان ماشي جنب بيت فيه أب و3 بنات. الأب كان غني لكنه فقد كل ثروته وما بقاش قادر يصرف على جواز بناته. وكان الحل الوحيد هو إنه يخلي بناته يشتغلوا في أعمال غير أخلاقية عشان يقدروا يوفروا الفلوس. ولما سمع القديس الحكاية قرر يساعد الأب وبناته الثلاثة.

راح القديس وجاب كيس من النقود ورماه جوه بيت الراجل ومشى، وبالفعل اتجوزت البنت الأولى. وبعد كده رمى كيس ثاني فاتجوزت البنت الثانية. لكن الحكاية مع البنت الثالثة كان فيها شيء قلب الدنيا.

والد البنت قرر إنه يعرف مين هو الراجل اللي بيساعده وبيديه الفلوس، واستنى جنب الشباك وأول ما ظهر نيكولاس عرفه وخبره شاع في المدينة كلها إنه القديس هو اللي بيساعد الناس وبيحقق لهم أمنيتهم.

من الحقائق المعروفة عن القديس نيكولاس إنه كان من المدافعين عن المسيحيين المضطهدين من قبل الدولة الرومانية وإنه هو كمان اتعرض للاضطهاد والتعذيب.

الأسطورة في حكاية سانتا كلوز

لكن لأن الحدوتة ما ينفعش تفضل صغيرة، ولأن الناس بتحب فكرة الشخص المخلص حكاية القديس نيكولاس ما وقفتش لحد هنا. الحكاية بدأت توصل من مدينة لمدينة وبدأ الناس تزود أساطير وحكايات ويقولوا إن القديس له بركة وكرامات. والحكاية فضلت تلف تلف لحد ما وصلت للولايات المتحدة الأمريكية.

إيه هو الشكل الحقيقي لسانتا كلوز؟

من خلال الأيقونات المسيحية للقديسين كان القديس نيكولاس بيترسم في هيئة رجل دين له لحية بيضاء وجسم نحيف. أما ملبسه فكان عبارة عن عباءة لها لون أحمر وعليها مجموعة من الرموز المسيحية. طب إذا كانت دي صورة سانتا كلوز منين جت الصورة اللي نعرفها دلوقتى؟ خليكوا معانا إحنا مكملين في الحكاية

سانتا في أمريكا

مع بداية وجود شعوب أوروبية كثيرة في القارة الأمريكية بعد اكتشافها كان لازم يكون في انتماء ثقافي لأفكار تراثية كثيرة. وكانت حكاية القديس نيكولاس من الحكايات المؤثرة في حياة الشعوب الأوربية في أمريكا زي الإنجليز والهولنديين. لكن كان كل شعب بيحاول إنه ينسب الشخصية ليه.. لكن أمريكا لها وجهة نظر ثانية.

مع اختلاط الثقافات انتصرت الثقافة الأمريكية في الكثير من الجولات. مثلاً شخصية القديس نيكولاس كان لازم تلبس اللبس الأمريكي، وبالفعل بدأت الصورة اللي نعرفها حالياً عن سانتا كلوز تظهر في قصيدة للأستاذ كليمنت مور أستاذ الدراسات اليونانية في المدرسة العامة في نيويورك. وكانت قصيدته تحت عنوان “زيارة من القديس نيكولاس”. وده كان سنة 1822. وفي القصيدة وصف سانتا إنه رجل ضخم الجسم وعنده عربة تجرها الغزلان وقادر على تحقيق الأمنيات.

أما الرسام توماس ناست اعتمد على القصيدة لما قرر يجسد ويرسم شخصية بابا نويل في عام 1874.

بابا نويل يشرب الكوكاكولا طوال العام

نيجي هنا لعلاقة بابا نويل بشركة كوكاكولا. في الثلاثينيات من القرن العشرين قررت شركة كوكاكولا إنها تطلق حملة دعائية جديدة لتشجيع الناس على شرب منتجاتها في الشتاء. وهدف الحملة إن الناس تعرف أن الكوكاكولا مش مشروب الأوقات الحارة فقط. لأ هي مشروب السنة كلها. هي المشروب القادر على منح السعادة. وطبعاً إيه اللي ممكن يخلي الناس سعداء ويحقق الأمنيات غير بابا نويل؟

وبدأت صورة بابا نويل تتطور وطبعاً اللون الأبيض والأحمر هما الألوان الخاصة بشركة كوكاكولا، واستمرت الحملة لسنين قدرت فيها الشركة تحقق مبيعات كبيرة، لكنها برضه كان قدرت تقدم للعالم كل مرة شكل جديد من أشكال سانتا كلوز.

ودي كانت الحكاية من البداية. أما النهاية فأكيد مختلفة عند كل حد. في ناس كثير في في حياتها سانتا، سانتا مش لازم يكون قديس أو خيال لكن ممكن يكون حد قريب قادر على منحنا السعادة.