قصص أطفال.. حدوتة خاتم السلطان

كان يا مكان في قديم الزمان كان في صانع دهب أمين وطيب. وكان دكانه قدام قصر السلطان. صانع الدهب كان اسمه مرزوق. وكان كل يوم الصبح وهو بيفتح دكانه يدعي ويقول “يافتاح يا عليم، يارب يا كريم، ياللي لو شاء ضاع في البحر انت قادر ترجعه للبحر. لكن في مرة من المرات كان الملك نايم وفاتح شباك اوضته، وصحى على صوت مرزوق وهو بيدعي ويفتح دكانتتعه.

الملك صحى غضبان ونادى على الوزير، قاله من اللي اتجرأ وعلى صوته قدام القصر. فالوزير قاله ده صنايعي غلبان كل يوم يدعي ربنا وهو بيفتح دكانته علشان ربنا يبعتله رزقه. لكن لو بيضايقك احنا هنقوله يدعي في سره.

الملك قام غضبان، وقاله لا يا وزير أنا هعلمه درس عمره ما ينساه، علشان يبطل يعلي صوته جنب قصر الملك.. وأمر الملك الوزير انه يجيب له خاتم السلطان.

خطة السلطان

نزل الملك من قصره ودخل دكانة مرزوق. مرزوق خاف واترعب، وقاله يا مولاي أؤمرني أنا رهن إشارتك. الملك قاله شايف الخاتم ده؟ ده خاتم السلطان وده أغلى خاتم في المملكة ومفيش منه 2. أنا عايزك تعملي نسخة طبق الأصل منه لكن بحجر من الازاز مش حجر من ألماس. ولو ما رجعتليش الخاتم الأصل والتقليد خلال 3 أيام أنا هطردك من المملكة كلها.

مرزوق قاله لا يا مولاي إن شاء الله أنا هكون عند حسن ظنك. لكن أنا عايز أخد الخاتم الأصلي علشان أقدر أعمل زيه. والملك وافق على طلب. وهنا أخد مرزوق الخاتم وحطه في صندوق جوه الخزنة. لكن قبل ما يقفل الخزنة بالمفتاح الملك قاله ممكن يا مرزوق تجيبلي كوباية مية. راح مرزوق بسرعة خرج برة الدكان.

مرزوق في ورطة

وهنا الملك طلب من وزيره ان يطلع بره ويراقب مرزوق، وراح فاتح الخزنة وأخد الخاتم من الصندوق. وبعدها رجع مرزوق وجابله المية والملك شرب ورجع تاني للقصر.

راح مرزوق يفرح مراته باللي حصل. وهنا قالت له إنت لازم تروح تقعد في الدكان علشان تحافظ على الخاتم. وبالفعل راح مرزوق لدكانته. لكن بعد ما فتح خزنته مالقاش الخاتم وفضل يدور عليه مالقهوش.

تاني يوم أمر الملك بتجهيز مركب صغيرة تاخده في نزهة في البحر. ولما ركب طلع الخاتم وقال للوزير أنا اخدت الخاتم علشان أعلم مرزوق درس ما ينساهوش..ويبطل يكون مزعج انا هرمي الخاتم في البحر، ومش هو كان بيقول ربنا قادر يرجع اللي وقع في البحر للبر ويزعجني بدعاه كل يوم، وريني بقى هيعمل إيه.

ومرات التلت أيام وراح الملك لمرزوق، وقاله هات الخاتمين، لكنه لاحظ إن مرزوق فرحان ومش خايف. وراح مرزوق اداله الخاتم المزيف. لكن الملك وقع بلسانه وقاله انت ازاي عملت الخاتم التقليد من غير النسخة الأصلية. فمرزوق قاله ومين قال كده، أنا عملته طبق الأصل والنسخة الأصلية معايا.

الملك رد وقاله انت بتكذب يا مرزوق انت عارف ان خاتم السلطان الأصلي مش معاك، وانا لازم اطردك من الدكان. لكن مرزوق طلع الخاتم الأصلي واداه للسلطان. وهنا السلطان فهم إن مرزوق عرف بلعبة الملك. الملك استغرب وقاله انت لاقيت الخاتم ازي.

خطة مرزوق

مرزوق قاله أنا بعد ما عرفت ان الخاتم ضاع قعدت في البيت حزين وتعبان، وفي يوم مراتي اشترت سمك للغدا، ولما جت تنضفها لقت فيها جسم غريب، ولما فتحتها لقت خاتم. راحت فرحانة وبتقول الحق يا مرزوق السمكة جواها خاتم قديم بس شكله مافيش منه اتنين وكانت بتحسبه خاتم مزيف. بس فجأة جريت عليها وبصيت على الخاتم فعرفت انه خاتمك، خاتم السلطان..وحمدت ربنا اللي قادر يرد اللى ضاع في البحر ويرجعه للبر.

بص الملك لمرزوق وقاله انت أمين وطيب وبتحب ربنا يا مرزوق..وعلشان كده ربنا أنقذك بإيمانك وبدعائك. وأمر بمكافأة كبيرة لمرزوق الأمين.

للمزيد: حواديت اطفال..قصة الأرنب الذكي.