قصة حسان والمراية السحرية

اهلا بيكم في حلقة جديدة من بودكات حكايات من 7 لـ 70..والنهاردة هنحكي قصة جميلة من عالم قديم وجميل وكله خيال في خيال..بس يا حلوين خليكوا فاكرين ان من غير خيال الإنسان ما يقدر يعيش وما يقدرش يحلم ويحقق الأحلام.

قصة حسان والمراية السحرية

كان يا مكان كان فيه صياد عنده ولد شجاع اسمه حسان. وفي يوم من الأيام كانوا في مركب الصيد بتاعتهم، وفجأة وعقت في شبكتهم سمكة كبيرة جدا، والد حسان قاله امسك الشبكة كويس وانا حروح بسرعة أجيد خطاف كبير علشان نمسك السمكة.

وراح الصياد وفضل حسان ماسك في الشبكة، وفجأة السمكة اتكلمت وقالت له، انت ولد شهم وشجاع، يرضيك تحرمني من أولادي وأصحابي. ارجوك سيبني وانا اوعدك أني اردلك جميلك ده اضعاف اضعاف.

حسان استغرب من كلام السمكة وقعد يفكر فيه، لكن في الاخر صعبت عليه وقرر يسيبها. ولما باباه شافه وهو بيفلت السمكة زعل جدا واتعصب عليه وقاله انت ضيعت مننا رزق يوم. حسان حسن بالندم وقعد يعيط وفجأة اختل توازنه ووقع وسط الموج العالي. لكن فجأة ظهرت السمكة وشالته جوه بطنها وجرت بسرعة لحد ما وصلته لبلد غريبة عليه.

نزل حسان من بطنها وقالت له انا مش ناسية الخير اللى انت عملته علشان كده لو احتجت اي حاجة اقف على الشط وسقف  3 سقفات.

حسان في المدينة الغريبة

فضل حسان ماشي جوه المدينة وفجأة لقى راجل بيجري ورا ارنب والارنب بيحاول يهرب. فقال لنفسه اكيد الارنب كمان عنده عيلة وأهل، انا لازم انقذه. وراح للراجل وقعد يشغله لحد ما الارنب هرب منه. وبعد شوية الارنب رجع لحسان وشكره على انه ساعده ينجو بحياته ووعده انه لو وقف تحت الشجرة وسقف تلت سقفات هيكون عنده وينفذله كل اللي هو عايزه.

فضل حسان ماشي في المدينة وفجأة لقى تجمع للناس بتحكي حكاية غريبة. بيقولوا ان الأميرة الجميلة هتختار أشجع حد في المدينة علشان تتجوزه ويكون امير. لكن بشرط صغير انه يحاول يختفي وهي بعد تلت ايام تدور عليه، ولو المراية السحرية بتاعتها عرفت مكانه يبقى هو ما يستحقش الأميرة ويستحق عقاب كبير.

وهنا فكر حسان وقال انه شجاع ونبيل وانه يقدر بمساعدة اصدقائه انه يختفي بعيد عن المراية السحرية ويتجوز الأميرة. وهنا قرر حسان إنه يروح للملك والد الأميرة علشان يطلب ايدها. وقاله يا ملك انا صحيح صياد فقير لكن عندي شجاعة ونبل يكفوا الدنيا كلها يخلوا الأميرة أسعد بنت في الدنيا. فادوني فرصة اعدي الاختبار.

حسان والخطة الذكية

راح حسان للشاطئ وسقف تلت سقفات، طلعت السمكة وحكى لها الحكاية. قالت ما تخافش انا هخبيك في بطني تحت المية لحد ما الأميرة تبص في مرايتها وعمرها ما هتلاقيك.

ولما جه الميعاد طلعت الأميرة فوق قصرها علشان تبص في مرايتها. وقتها قامت السمكة أخدت حسان جوه بطنها ونزلت في عمق البحر وطلبت من السمك اني يلف حواليهم كثير علشان الموج يداري عليهم. وفضلت الأميرة تبص في مرايتها السحرية وما قدرتش توصل لحسان، لكنها اكتشفت ان البحر في حركة غريبة فقعدت تبص اكتر وعرفت ان حسان جوه بطن السمكة.

الخطة البديلة

جاب الحراس حسان والملك قاله انه سقط في الاختبار ويستحق العقاب. لكن الأميرة كانت بدأت تحب حسان فقالت لوالدها الملك انه شجاع وانه حاول يختفي وعرض نفسه للخطر علشان كده هو يستحق فرصة تانية. لذلك أمر الملك الحراس انهم يسيبوا حسان.

راح حسان وافتكر وعد الأرنب ليه، ووقف تحت الشجرة وسقف 3 سقفات. جاله الأرنب وسمع حكايته. لكنه بعد عنه واختفي. فضل حسان زعلان وحاسس انه أمله في جواز الأميرة انتهى. لكن فجأة ظهر الأرنب وقاله تعالى معايا. الأرنب خدوا ودخلوا نفق كبيير تحت الأرض، وقاله انا حفرت النفق ده وخليته بيودي على اوضه الأميرة. انت هتستخبى تحتها على طول وبكده عمر المراية ما هتشوفك. واول ما تسمع ان الأميره قالت انك اختفيت اطلع من فتحة النفق وهتلاقي نفسك قدام الأميرة على طول.

وفعلا نفذ حسان اللي الأرنب قاله ليه، وبمجرد ما الأميرة قالت للملك ان المراية مش لاقية حسان قال الملك يبقى كده هو نجح في الاختبار ومن حقه يتجوز الاميرة احلى بنت في المملكة.

وظهر حسان وطلب من الملك انه يبعت يجيب باباه من القرية البعيدة واعلنوا الافراح وعاشوا كلهم في تبات ونبات.

للمزيد: قصص أطفال.. حدوتة خاتم السلطان.