قائمة المنتجات المهمة للأطفال عمر سنتين
الأطفال في عمر سنتين بيكونوا بدأوا مرحلة جديدة من النمو. في مقالنا هنعرف قائمة منتجات مهمة للأطفال في العمر ده. عشان تكوني جاهزة ومستعدة لكل احتياجاتهم وعشان تسهل عليك كثير من المهمات الصعبة.
قائمة المنتجات المهمة للأطفال من الملابس
لما الطفل يوصل لعمر سنتين هنحتاج ملابس مختلفة شوية عن المرحلة السابقة. أولاً هنحتاج ملابس سهلة الحركة لأن الأطفال هيبدأوا رحلتهم مع المشي والزحف.
لكن القاعدة الأساسية لكل الملابس اللي هتحصلي عليها هي دفع مبلغ مناسب. الماركات التجارية الغالية شيء مهم لكن مش في كل الملابس، نظراً لأن الأطفال لهم قدرة كبيرة على إفساد أي طقم جديد. غير كده نموهم السريع بيخلي استخدام الملابس محدود في فترة معينة.
- أهم قطع ممكن توفريها هي الليجنز/ Leggings..أولاً هي بتسهل الحركة جداً، ومش بتحتاج مجهود كبير في التنظيف. وتقدري تحصلي على قطع متعددة بأسعار مناسبة.
- الصيف حيكون مناسب جداً للحصول على مجموعة من التيشرتات القطن النص كم. لكن الشتا يفضل شراء ملابس أثقل من الصوف أو القطن المكون من أكثر من طبقة.
- ما تنسيش تحضير الأحذية والصنادل لأن مع الحركة ممكن يفقدوا أزواج كثيرة فكوني مستعدة.
حفاضات سراويل داخلية
طبعاً في السن ده تغيير الحفاضات هيكون متعب شوية. لأن الطفل حركته هتكون أكثر وفجأة هتلاقي نفسك بتقومي بحبة حركات بهلوانية عشان تغيري حفاضة واحدة. عشان كده ابدأي في تحضر حفاضات السراويل الداخلية، بتكون أسهل في اللبس والخلع وتوفر مجهود كبير.
قائمة المنتجات المهمة للتغذية
في عمر سنتين يبدأ الطفل يعتمد اعتماد كلي على التغذية العادية بعد نهاية رحلة الرضاعة الطبيعية. عشان كده في مجموعة أدوات مهمة محتاجة إنك تضميها للقائمة الجاية.
- كوب الشراب، ومن الأفضل إنك تحصلي على الأنواع محكمة الغلق تفادياً لكوارث كتير. وطبعاً أفضل اختيار هيكون الأكواب المصنوعة من السيليكون أو البلاستيك الصحي. ومش محتاجين نفكرك استبعاد الزجاج نهائي لأن ده سن تطوير رياضة قذف أي شيء عند الأطفال.
- الأواني البلاستيكية أو السيليكون. وبنفضل يكون الطفل له الأواني الخاصة بيه وطبعاً حاولي تحصلي على أواني لها ألوان مبهجة وأشكال تربطه باستخدامها.
- مرايل الطعام، أو البفتة. تحسباً لأي حركات فجائية من الطفل يفضل وجود مريلة أو بافتة. دوري على الأنواع المبطنة بالمشمع اللي بتمنع وصول السوائل لملابس الطفل. وأفضل اختيار ممكن يكون للبفتة السيليكون لأنها سهلة التنظيف.
قائمة المنتجات المهمة من الألعاب
وهنا يجي وقت اللعب، يا ترى إيه أفضل ألعاب ممكن نوفرها للطفل في الوقت ده؟
- كتب التلوين، طبعاً مش متوقعين خروج لوحات عظيمة. لكن الكتب دي مهمة عشان تنمية المهارات البصرية عن الطفل.
- البطاقات التعليمية للكلمات. في العمر ده بيبدأ الطفل في تكوين رصيده من الكلمات، وبطاقات الكلمات بتساعده على زيادة الرصيد وخصوصاً إنها بتتيح ربط الكلمات بالصور.
- المكعبات، لكن من المهم نتأكد إنها مصنوعة من مواد صحية. ونختار الأحجام الكبيرة اللي بيكون بلعها صعب.
- الألعاب المحشوة. النوع ده صالح للاستخدام لوقت طويل من عمر الطفل. لأنه بيقدر يكون مع الألعاب اللي لها أشكال الحيوانات أم الأبطال المحببين ليه صداقات كثيرة ما حدش يقدر يفهمها غيره.
للمزيد: 7 من أفضل ألعاب الأطفال عمر سنتين
دي كانت قائمة المنتجات المهمة الخاصة بالملابس وأدوات الطعام والألعاب. هل لسة في حاجات ما قلناش عليها؟ طبعاً لسة في كثير هنتكلم عنهم في مقال تاني فاستنونا.
للمزيد: لكي تكون تجربة الأمومة أسهل إليك بعض المنتجات الهامة
