عشان التركيز والمذاكرة ما تنسيش أهم الأكلات دي

هل كل مرة بيكون الأولاد ما عندهمش قدرة على التركيز والمذاكرة بيكون السبب كسل منهم؟. لأ خالص ده مش شرط أبداً. حالة انعدام التركيز ممكن يكون لها أسباب كثير، منها التوتر أو قلة النوم، ومنها كمان النظام الغذائي. ممكن يكون الأولاد بياكلوا أكل صحي لكن محتاجين عناصر تساعدهم على تنشيط مراكز الذاكرة والتركيز في المخ. نلاقي العناصر الغذائية دي فين؟ هو ده اللي هنعرفه في مقالنا النهاردة.

أكلات مهمة تساعد على التركيز والمذاكرة

البيض

أول ما حنقول كلمة البيض قدام الأولاد أكيد هنسمع اعتراضات كثير، ويمكن ده اللي بيخلي أمهات كثير ما تقدمهوش في وجبات الفطار. لكن البيض يعتبر من أهم المواد الغذائية اللي بتساعد على تنشيط مراكز الذاكرة والتركيز لأنه بيحتوي على البروتين وعلى مادة الكولين.

لو الأولاد مش بيفضلوا تناول البيض في صورته العادية ممكن نعمل مهروس البيض مع المايونيز ونقدمه على التوست المحمص. بكده نقدم لهم وجبة بيحبوها وفي نفس الوقت تساعدهم على التركيز والمذاكرة بشكل أفضل.

وجبات الشوفان المختلفة

الشوفان عنصر غذائي مهم جداً، عشان كده من المهم عدم إهماله في وجبات الأطفال الأساسية. أهم مميزات الشوفان إنه بيحتوي على الزنك وفيتامين E و B، المواد دي بتنشط خلايا الدماغ بصورة كبيرة وبتساعد الأطفال على الحصول على النشاط معظم الوقت.

التونة وسمك السلمون

في دراسات كثيرة وأبحاث أكدت إن الأشخاص اللي بيعتمدوا في غذائهم على الأسماك الدهنية بيتمتعوا بنسبة أعلى من الذكاء. وأسماك السلمون والتونة من أهم أنواع الأسماك الدهنية لأنهم بيحتوا على الأوميجا 3. ومن المعروف أن الأوميجا 3 من أهم العناصر اللي بتحفز مراكز التركيز والذاكرة في المخ.

على الأقل من المهم إن الأطفال يحصلوا مرتين في الأسبوع على السلمون أو التونة أو أي من المأكولات البحرية. 

زبدة الفول السوداني

خلي زبدة الفول السوداني من ضمن قائمة الأغذية المهمة على مدار الأسبوع. بالإضافة لطعمها المميز جداً إلا إنها من الأغذية المهمة لزيادة القدرة على التركيز والمذاكرة. زبدة الفول السوداني بتحتوي على فيتامين E، وهو من أهم الفيتامينات المضادة للأكسدة وبتساعد على حماية الأغشية العصبية.

الموز مهم للتركيز والمذاكرة

الموز بيعتبر من الفواكه اللي صعب إن الأطفال يرفضوها، وفي نفس الوقت من أهم العناصر الغذائية المهمة للقلب والأعصاب والمخ، ممكن تقديمه في صورته العادية أو في الفطائر المختلفة.

اقرأي أيضا: بدء الدراسة أون لاين .. خطط لتشجيع الأولاد على الدراسة