خناقات الأطفال في البيت.. طريقة التدخل السليمة ووقتها

هل في يوم ممكن يمر من غير خناقات الأطفال؟ بالتأكيد لأ. عادة كل شخص بيكون ليه طلبات وميول ولو حصل تداخل بين اثنين أو أكثر توقعي دايماً وجود شجار وخناقة. لكن هل من المطلوب منك إنك تدخلي كل مرة؟ طب إيه هو الوقت اللي لازم تاخدي فيه خطوة لورا؟. وإيه وقت التدخل الحاسم؟. كل ده هنعرفه في مقالنا النهاردة.

خناقات الأطفال ووقت إنك تاخدي ركن بعيد

هل في وقت يفضل إن الأم تاخد ركن بعيد أو بمعنى أصح ما تتدخلش في خناقات الأطفال؟. بالتأكيد ده لازم يحصل. طالما إن الخناق أو الشجار ما زال في مرحلة الجدال. بمعنى أصح طالما الأطفال قادرين إنهم يتعاملوا مع الاختلاف بينهم بالكلام أو بطرق سلمية. تدخلك هنا هو الخطأ الكبير. لأن مرحلة الشجار أو التفاوض بتعلم الأطفال مهارات اجتماعية مهمة. منها تطوير عواطفهم من الغضب للتفهم. أو من السكون للغض للرفض. كذلك مهارات حل المشكلات تعتبر من أهم الأشياء اللي ممكن يكتسبوها في الوقت ده. وتدخلك بشكل سريع بيحرمهم من فرص كثير لتطوير شخصياتهم.

اقرأي أيضا: تربية أكثر من طفل بطريقة أوروبا والدول المتقدمة

وقت التدخل السريع

لكن تدخلك لازم يكون حتمي وسريع في حالة تطور الخلاف لاعتداء لفظي أو جسدي. هنا لازم يكون ليكي موقف صارم وحاسم لإنهاء الاعتداء وبعدها نبدأ في وضع خطة الحلول الممكنة.

خطوات عملية لوقف خناقات الأطفال 

بعد التدخل لمنع الأذى الجسدي يعني ما تبعدي كل طرف عن الثاني لازم نبدأ نتعامل مع الموقف بهدوء. وممكن نقسم حل الخلاف بينهم لمجموعة من الخطوات المهمة كالآتي:-

فصل القوات المتنازعة

الهدوء النفسي الداخلي هو أول خطوة لازم تاخديها مع نفسك عشان تقدري تسيطري. تخيلي لو الأولاد في حالة من الشجار والصراخ والعنف وإنت عندك نفس الحالة. وقتها لا يمكن يكون في حل. خدي نفس عميق وابدأي بإعطاء الأوامر الصارمة.

• بمجرد بداية الشجار العنيف أو محاولة أي طفل ضرب الآخر أو إلقاء اللعب عليه لازم تظهري كأنك سوبر مان. امنعي أي شكل من أشكال العنف بصرامة. واعطي أمر صريح بإبعاد كل طفل عن الآخر سواء إن كل شخص فيهم يقف في مكان بعيد عن الثاني، أو أمر مباشر بإن كل طفل يروح لغرفته لحد ما يهدأ.
• أول مراوغة هيقوم بها الأطفال هي الشكوى وسط المعركة، وكل حد هيحاول يستميلك تجاه وجهة نظره عشان يحقق الانتصار. قوتك هنا تبدأ بالامتناع عن الاستماع. الأمر الصارم اللي فات لازم يتنفذ ولازم كل شخص يبعد عن الثاني. هنا أول خطوة بتعلمي بيها كل طفل فيهم إن الخناق مش هو الوسيلة الصح للحصول على أي مكسب.
• ارفضي أي نقاش أو عرض للشكوى إلا في الوقت اللي انت تحدديه.
• لازم يكون في عقاب عادل للطرفين. لكن في البداية اتأكدي إن ما حدش فيهم حصل على انتصار وقت الخناق.

تحديد المشكلة وحلها

لو طبقنا النظرية من خلال مثال حي ممكن نقول إن أكثر المشاكل بتكون على شيء مشترك، زي لعبة أو جهاز التابلت. وهنا هنلاقي الحل بالطريقة دي.

• أولاً اطلبي من كل طفل إنه يتكلم ويعبر عن سبب المشكلة من وجهة نظره. ومن ناحية ثانية يسمع لوجه نظر الطفل الثاني. ما ينفعش واحد ياخد فرصته في الكلام على حساب الثاني.
• ما تقدميش حل جاهز. لازم كل حد فيهم ياخد وقت وفرصة للتفكير في الحلول الممكنة.
• تدخلي بشكل إيجابي لتوضيح فكرة معينة. مثلاً إسألي كل حد فيهم هل ينفع إنه يكون المستخدم الوحيد لجهاز التابلت.
• خلي كل حد فيهم يقول مجموعة من الحلول اللي شايفها ممكنة من وجهة نظره. على الطرف الثاني إنه يقول مدى مناسبتها ليه.
• ابدأي بطرح مجموعة من الاقتراحات.
• خلي كل طفل ياخذ وقت عشان يفكر في الحلول اللي سامعها ويشوف الأنسب ليه عشان الوصول للحل الأمثل.

خطوط عريضة ومهمة للتعامل مع خناقات الأطفال

ومع خطواط البحث عن حل لخناقات الأطفال اللي مش بتخلص في البيت، في مجموعة من الأمور المهمة اللي لازم كل أم تاخد بالها منها. ايه هي؟ تعالي نعرفها مع بعض.

عاملي الجميع بنفس الطريقة

خلينا هنا نتفق إن الهدف الأساسي من التعامل مع الموقف هو تربية الأطفال على مبدأ نبذ القتال ورفضه. وبالتالي ما ينفعش نقبل إن فيه طرف معتدي وطرف ضحية. في النهاية مبدأ التشاجر مرفوض. عشان كده ما تاخديش صف واحد ضد الثاني. الاثنين واقفين على نفس الخط من الخطأ وهو تحويل المشكلة لعنف وشجار.

لكن هنا برضه من المهم الانتباه للفروق بين الطرفين. مثلاً معاملة الطفل 3 سنوات مش هي نفسها معاملة الطفل في عمر 6 سنوات. أكيد في طريقة للحوار بتختلف من طفل للثاني لكن في النهاية حاولي إن تكون نتيجة العقاب واحدة. فإذا كان العقاب عدم حصول أي منهم على اللعبة فلازم يتطبق على الجميع.

تجنبي المقارنة

وقت الخناقة والشجار كلمة زي “انت الكبير وانت الأعقل” دي من أخطر الكلمات اللي لها تأثير سلبي على الأطفال. لا يمكن لطفل يفهم المغزى منها. عشان كده امتنعي عن مقارنة طفل بالآخر سواء في السن أو السلوك. أهم حاجة تتعمل هي دفع كل طفل فيهم للبحث عن حل بعيد عن الشجار والعنف.

للمزيد: المولود الثاني.. خطوات عملية لتشجيع طفلك على استقباله