بنتي طفلة عصبية جداً..إيه الحل؟
مشكلة العصبية عند الأطفال من المشكلات اللي فيه أمهات كثيرة بتواجهها. لكن في نفس الوقت مش في كل المرات بتكون مواجهتها بشكل سليم. ولو بنتك طفلة عصبية بتحاولي دائماً إنك تحسني سلوكها وتوجيه للاتجاه الصحيح. لذلك من المهم إنك تفهمي إيه هي قواعد التعامل مع العصبية عند الأطفال. وبعد كده حتقدري بسهولة تحولي العصبية لهدوء.. وده يحصل إزاي؟ ده اللي هنعرفه في مقالنا النهاردة.
سبب العصبية عند الأطفال بشكل عام
قبل ما نعرف إزاي نتعامل بشكل إيجابي مع الطفلة العصبية لازم نشرح نقطة مهمة جداً. أولاً العصبية عند الأطفال لا تعتبر سلوك إرادي ناتج عن سوء التربية. لكنها سلوك غير إراداي أو بمعنى أصح رد فعل غير إرادي بيحركه المخ نتيجة التعامل مع تهديد ما. ولأن المخ مش بيقدر يدي الإشارات الصحيحة بيقوم الطفل بالتصرف بشكل عصبي. لذلك مهمة كل المحيطين بالطفل إنهم يحالوا تدريبه بالتدريج على التحكم في رد فعله ومحاولة تعليمه مواجهة الخطر أو التهديد بشكل إيجابي. وده ممكن يحصل من الخطوات الجاية.
لو بنتك طفلة عصبية جداً..قومي بالخطوات الجاية
في مواقف كثيرة حتبدأ بنتك تتفاعل معاها بشكل عصبي. شعورها بالقلق والتهديد هما المحركين ليها ودي أهم حاجة لازم نفتكرها. لذلك أهم خطواتنا لازم تقوم على تفهم ما وراء السلوك. بعد كدة ترويضه للسيطرة عليه. وده ممكن يتم من خلال الآتي:-
الأنشطة الخاصة بتحفيز المخ
من خلال بعض الأنشطة ممكن نوجه رسائل للمخ مفادها إنك غير معرض للتهديد. وإن في طرق مختلفة لحل المشكلة. والأنشطة دي ممكن نلخصها في مجموعة من الخطوات:-
- ممكن ندي الطفلة المستيكة لمضغها لحد ما توصل لحالة من الهدوء.
- نبدأ الكلام والحديث بهدوء وصوت منخفض. أو نشترك معاها في أغنية محببة عشان تبدأ تتراجع عن العصبية هيكون لها مفعول كبير.
- لو نقدر نجهز قطعة من الشوكولاتة الداكنة هيكون لها تأثير كبير على تهدئة الطفلة.
- لو شعرنا إن الطفلة في حالة من العصبية ممكن نساعدها إنها تتغرغر بالماء. الطريقة دي هتساعدها على الهدوء.
التنفس بطريقة صحيحة
تنظيم النفس قادر على توصيل الطفلة لمرحلة من التركيز والهدوء. وبالتالي هيكون من السهل التنفيس عن العصبية وتحويل السلوك العصبي تماماً. وده نقدر نعمله من خلال الخطوات الجاية.
- نطلب من الطفلة التنفس بعمق لمدة ثلاث مرات. يعني نطلب منها تقوم بالشهيق والزفير بشكل بطيء.
- ممكن نستخدم على مدار اليوم الألعاب المختلفة لتنظيم النفس على مدار اليوم.
دمج الطفلة في الأنشطة المجهدة
كل اللي احنا محتاجين نعمله هو مساعدة البنت على التحكم في العواطف والسيطرة عليها. وفي مجموعة من الأنشطة الحركية تقدر تقدم لها الدعم. ممكن مثلاً نطلب منها القيام بأي من الخطوات التالية:-
- وضع حقيبة على ظهرها.
- حمل مجموعة من الكتب ونقلها.
- تمارين دفع الحائط.
- تنظيم مكونات الغرفة أو الدولاب أو أي من الأدراج.
الحديث حول سبب العصبية
وهنا في أثناء مرور الطفلة بالحالة العصبية نقدر نطلب منها الهدوء وبعد كده الحديث عن كل الأشياء المزعجة. وبالتالي هنسمح لها بالتعبير عن نفسها والتنفيس عن غضبها لكن بشكل إيجابي.
