بالصورة.. أفكار مجنونة وموفرة لتزيين شنط المدرسة

الأطفال بيحبوا إنهم يكونوا مميزين ومختلفين وسط زملائهم. عشان كده ممكن تلاقيهم بيطلبوا طلبات مختلفة. زي مثلاً إن شنط المدرسة الخاصة بيهم يكون لها شكل معين أو يكون عليها رسومات معينة. لكن ده ممكن يخليك مرتبكة ومش عارفة الحل إيه. كذلك ممكن تندفعي وتصرفي فلوس كتيرة وتشتري شنطة جديدة. لكن لأ..الأفكار الجاية هتخلي شنط أولادك هي الشنط المطرقعة والمجنونة بجد.

أفكار لتزيين شنطة المدرسة مطرقعة ومجنونة

عادة لما بتشتري شنط المدرسة للأولاد بتختاري شنطة قوية ومتينة ولونها غامق عشان تستحمل لأطول فترة ممكنة. لكن الأولاد بيكون ليهم رأي مختلف. وده لأنهم عايزين شنطة بتعبر عن شخصيتهم. كذلك الموضوع مش بيقف لحد هنا الطفل دايماً محتاج يكون مواكب للعالم من حواليه. لكن في نفس الوقت إحنا محتاجين إننا نوفر الميزانية فيبقى الحل إي؟ الحل في الأفكار التالية:-

تلوين الشنطة

أسهل وأرخص طريقة ممكن تستخدميها هي تلوين الشنطة لو كانت الشنطة سادة من غير ألوان. لكن جهزي ألوان مخصصة لتلوين القماش ومش لازم تعملي رسومات دقيقة. ممكن خطوط عشوائية أو دوائر بسيطة تقضي الغرض وتخلي شكل الشنطة رائع.

رسومات الكانفا

ممكن تخلي شكل الشنطة مطرقع جداً وبتاكليف قليلة جداً. كل اللي محتاجاه إنك تختاري مجموعة من رسومات الكانفا الجاهزة ودي بتبقى موجودة في الأسواق ومتوفر وبتلزق عن طريق كويها. وفي رسومات بالجليتر أو الخرز للبنات.

الدبابيس المطبوعة  

الدابيس فكرة سهلة وسريعة. لكن أهم حاجة بتميزها إن ممكن الطفل يغيرها ويغير أماكنها طول الوقت. وبكده يقدر يحس إن الشنطة جديدة ومختلفة طول الوقت. كذلك الدبابيس متوفرة بأشكال كتيرة. وفي اللي عليها أشكال أو شخصيات كرتونية أو كلمات محفزة للنشاط والتفكير.

الجينز والدانتيل

لو عندك بنطلون جينز قديم ممكن تستغلي القماش الخاص بيه لعمل جيب زيادة في واجهة الشنطة. لكن عشان يكون الشكل رائع جداً ممكن تستخدمي الدانتيل لتزيين قمة الجيب. كذلك ممكن تستخدمي شرائط من القماش على شكل ضفيرة زي ما موجود في الصورة.

خيوط الصوف

كل أم فينا أكيد عندها كمية كبيرة من خيوط الصوف. اجمعي مجموعة خيوط قصيرة واربطيها من المنتصف لحد ما تبقى شبه الوردة اللي واضحة في الصورة. بعد كدة وزعيها بالطريقة المناسبة على الشنطة وهتخلي شكلها مطرقع جداً.

أشكال بسيطة

لو عندك قماش باقي في البيت ممكن تقصيه على شكل دوائر وتعملي الِأشكال الخاصة بالكرتون زي ما هو موضح في الصورة. وممكن تلاقي الأشكال دي جاهزة وتقومي بتجميعها ولزقها على الشنطة من خلال استخدام الصمغ المخصص. وبكده شكل الشنطة يكون مختلف تماماً عن الشكل الأصلي لها.

دي كانت أفكار سهلة وبسيطة جداً تقدري من خلالها تخلي شنطة المدرسة شكلها مبهر جداً. لكن في النهاية إنت هتكوني أم رائعة لأنك أسعدتي أطفالك بأقل إمكانيات موجودة.

للمزيد: التنمر المدرسي.. علامات تدل على تعرض الطفل له.