أشطر بابا وقت الرضاعة!! مش الموضوع غريب شوية؟. من المعروف إن الأم هي المسئولة عن الرضاعة الطبيعية من الألف إلى الياء إيه بقى دخل الأب. الحقيقة إن دور الأب كبير ومهم وبيفرق مع الأمهات بشكل كبير. والنهاردة هنعرف سوا إيه هو دوره.
بابا ووقت الرضاعة
للأسف في مفاهيم مجتمعنا إن الطفل الرضيع مش بيحتاج غير الأم في أول حياته، هي المسؤولة عن تغذيته وحمايته وكل الأمور الخاصة بتقديم الرعاية ليه. لكن الحقيقة إن الأب كمان له دور مهم جداً هو كمان مسؤول عن تقديم الرعاية للطفل ويقدر يعمل حاجات كثير. غير كده فدوره الأهم هو مساعدة الأم ودعمها في فترة الرضاعة الطبيعية. وخلال استبيان تم على مجموعة من السيدات المرضعات وجد إن نسبة 70% منهم قدروا إنهم ياخدوا قرار الرضاعة الطبيعية نتيجة لدعم أزواجهم بعد التشاور معاهم. وفي نسبة ثانية من السيدات بيتمنوا لو كان لأزواجهم دراية ومعلومات كثيرة عن فترة الرضاعة الطبيعية.
للمزيد: الرضاعة الطبيعية الناجحة للأم الجديدة
ايه هو دور بابا في وقت الرضاعة؟
دور الأب بيقوم على حاجات كثيرة جداً يقدر يقدمها، وممكن نذكرها في مجموعة من الخطوات المهمة ومنها:-
مرحلة ما قبل الولادة
قبل الولادة مرحلة مهمة جداً للتحضير لفترة الرضاعة. دور الأب هنا بيتمثل في حواره مع الأم عن تنظيم الفترة المقبلة. وده الوقت المناسب لتحضير مستلزمات المولود سواء كانت مادية أو نفسية. وهنا برضه بيجي الوقت لتقسيم المهمات بين الشريكين، وده بيكون أكبر داعم للأم عشان قلقها وتوترها يبدأ يقل.
تشجيع الأم على الرضاعة الطبيعية
ممكن الأم تشعر بالتراجع وتخاف من قرار الرضاعة، هي عارفة إن ده معناه إنها لازم تتواجد مع الطفل أطول وقت ممكن. لكن الرضاعة مع العمل مع مسؤولية البيت ممكن يشكلوا ضغط عصبي عليها، وهنا تقرر إنها تعتمد على الرضاعة الصناعية. لكن لو في شريك موجود عشان يتحمل جزء من المسؤولية النفسية والمادية هيفرق في قرارها كتير. وعشان تكون أشطر بابا مهمتك في الوقت ده هي التواجد والحضور والتأكيد إنها مش هتكون قدام الموجة لوحدها.
تقديم الدعم أمام الأفراد الآخرين
أثناء الرضاعة وتربية الأطفال للأسف ناس كتير من المحيطين بالأم بيشكلوا مصدر من مصادر الضغط. وفي ناس مهمتها إظهار الأم وكأنها شخص مقصر في واجباته، والأشخاص الكبار بيكونوا في حالات كثيرة هما مصدر الضغط. وعشان كده لازم الأم ما تتحطش في وش المدفع لوحدها. دور الأب هو دعمها وتوضيح للآخرين إن هو وهي بيقوموا بدورهم على أكمل وجه، وإن أي قرار يخص الطفل هو قرار مشترك بيقوموا بيه هما الاتنين سوا.
الدعم النفسي
أمهات كتيرة ممكن تلجأ للرضاعة الصناعية خوفاً من زيادة الوزن أو التغيير في الشكل. الشريك السيء هو اللي بيطلب من الأم إنها تكون بمواصفات خارقة طول الوقت مع مهمتها. أم الشريك الجيد بيوصل للأم إنها جميلة ومقبولة في شكل ووزن، وإنه فعلاً قادر يفهم طبيعة المرحلة اللي بتمر بيها سواء على المستوى الجسدي أو النفسي وإنه إيده دايماً في إيدها.
الجزء ده مش بيشكل دعم للأم على المستوى النفسي بس، لكنه بيقدر يأثر في الهرمونات المسؤولة عن إفراز اللبن وجودته. وعن طريقة تعامل الأم مع رضيعها وكل ده بيصب في مصلحته بكل الطرق.
الاستماع هو أقوى مساعدة في فترة الرضاعة
كم التوتر والقلق والتعب اللي الأم بتمر بيه في فترة الرضاعة كبير للغاية. وأكبر مساعدة ممكن الشريك يقدمها هو الاستماع لها في الوقت اللي تقرر فيه تشتكي. هي في الحقيقة في كل مرة بتحاول تتطمن إنها مش لوحدها.
المساعدة في أعمال البيت
لو الأم عاملة ومسؤولة عن رضاعة الطفل وتحضير الأعمال المنزلية أكيد ده شيء غير عادل. لكن دور أشطر بابا هنا هو المساعدة والتخفيف من الأعباء. توزيع المسؤوليات في الفترة دي من أهم الحاجات اللي ممكن تدعم الأم وتخليها تقوم بواجبها على أكمل وجه.
الوجبات الليلية
في الكثير من الأحيان الطفل بيصحي بالليل سواء للأكل أو الحاجة للتغيير. لو الأم بتستعمل طريقة شفط الحليب ممكن الأب يكون مسؤول في مجموعة من الأيام عن إطعام الطفل في الوقت ده. حتى لو الأم هي اللي هتقوم بالمهمة ممكن الأب يشاركها في حاجات كثير زي التغيير للمولود أو تحضير الأدوات اللي هي هتحتاجها ودي أعظم مشاركة ممكن تتقدم للأم في الوقت ده.
