تزيين شجرة الكريسماس..بالصور 10 أفكار رائعة وجديدة

في أفكار كثيرة تساعدنا في تزيين شجرة الكريسماس عشان بداية العام الجديد. من المعروف إن الزينة دايماً تتنوع ما بين الأحمر والذهبي والأخضر. ودي شجرة الكريسماس الكلاسيكية. بس عشان التنوع والتجديد في أفكار جديدة ومختلفة ممكن نستخدمها في تزيين شجرة الكريسماس. 

أفكار جديدة جداً لتزيين شجرة الكريسماس

لإن شجرة الكريسماس تعتبر من أكثر الحاجات المبهجة في رأس السنة، فمن المهم إننا نفكر كل مرة إزاي نخليها مختلفة. طبعاً في كثير مننا عندهم شجرة قديمة، وفي ناس هتشتري. لكن في الحالتين في حاجات ممكن نعملها على الشجرة عشان نخليها مميزة جداً ومنها:-

تزيين شجرة الكريسماس بصور العائلة

مع الكرات الذهبية والحمراء في حاجة ممكن تخلي شجرة الكريسماس رائعة جداً ولا يمكن تتنسي. الحاجة دي هي الصور العائلية أو صور الأصدقاء. ممكن نطبع صور أكثر الصورة المحببة لينا. وباستخدام الدبابيس أو المشابك الملونة نثبتها على الشجرة، وهيكون عندنا شجرة رائعة.

شجرة الحلويات

هل من الممكن إننا نستخدم الحلويات على الشجرة؟ طبعاً. ممكن نقوم بلف الكوكيز أو البونبوني في أوراق من السلوفان الملون ونعلقها من خلال أشرطة أو دبابيس على الشجرة. الطريقة دي في التزيين تقدر تخلي الشجرة مبهجة جداَ.

الكرات الملونة

ياللا بينا نتخلى على النمط الكلاسيكي في تزيين الأشجار. لكن نعمل كده إزاي. بسيطة وسهلة. ممكن نحضر ألوان مختلفة من الكرات اللي بنعلقها على الشجرة. ونخصص كل جزء للتزيين بلون معين. وبالتالي هيكون عندنا شجرة متدرجة الألوان وجديدة تماماً.

النجوم وعيدان الصنوبر

في أشكال وأنواع مختلفة من النجوم سواء المصنوعة من البلاستيك أو الورق. دي هتكون العنصر الأساسي في التزيين. لكن لو زودنا عيدان من شجرة الصنوبر هيكون الشكل فائق الجمال.

تزيين شجرة الكريسماس بالدوناتس

ممكن نخرج عن المألوف تماماً. يعني بدل ما الشجرة تكون لونها أخضر، ممكن نستخدم فروع بألوان مختلفة زي اللون الوردي. لكن إيه اللي ممكن يدي اللون الوردي بهجة أكثر؟ أكيد لو علقنا قطع من الدوناتس الملون.

استخدام الشرائط المنقوشة

من أكثر الحاجات اللي ممكن تكون موجودة في البيت الشرائط الستان سواء السادة أو المنقوشة. ممكن نوزعها بطريقة عشوائية أو داير ما يدور على الشجرة وهتخلي منظرها جذاب للغاية.

لمسة كلاسيكية

ممكن برضه نعمل لمسة كلاسيكية وجذابة جداً في تزيين شجرة الكريسماس. ببساطة ممكن نلف الهدايا بورق لامع ما بين اللون الذهبي واللون الفضي.

شجرة الكريسماس البيضاء

الثلج والبرد من أكثر الحاجات المميزة للكريسماس. لكن هل ممكن نستغل ده في الشجرة. بالتأكيد.. نقدر نعمل ده من خلال استخدام الشرائط البيضة أو الكور الفضية وكل الزينة اللي على شكل الثلج. أما اللمسة المختلفة فهتكون من خلال وضع فراشات ملونة جميلة مع الكرات المعدنية.

بعض الغزلان

أما الغزلان فهي أيقونة من أيقونات الكريسماس ما نقدرش نستغنى عنها. لكن ممكن المرة دي نوزعها في أجزاء مختلفة على الشجرة. وممكن كمان نستخدم ألوان وأحجام مختلفة من الغزلان. ده هيمنح شجرة عيد الميلاد مشهد أقرب للمشهد الطبيعي تماماً.

استخدام الورد الأحمر

بدل الكرات والزينة ليه ما نعملش حاجة جديدة تماماً؟ الورد الأحمر من أكثر الأشياء المبهجة وتوزيعه على شجرة عيد الميلاد هيخليها مختلفة تماماً. لكل محبي الورد أكيد تزيين شجرة الكريسماس بالزهور الحمراء هيكون له رونق خاص.

ودي كانت 10 أفكار مختلفة لتزيين شجرة الكريسماس. وممكن ندمج أفكار كثير وممكن نستخدم أكثر من عنصر في تزيينها. لكن في النهاية مش مهم إحنا هنخلي الشجرة شكلها إيه. المهم إننا نشترك في تزيينها ونصنع مع بعض لحظات سعيدة نستقبل بيها العام الجديد 2023.

للمزيد: بالصور 6 أفكار مجنونة لأشكال الحلويات في حفلة رأس السنة